ishhq mujh ko nahi wehshat hi sahi

عشق مجھ کو نہیں وحشت ہی سہی
میری وحشت تری شہرت ہی سہی

قطع کیجے نہ تعلق ہم سے
کچھ نہیں ہے تو عداوت ہی سہی

میرے ہونے میں ہے کیا رسوائی
اے وہ مجلس نہیں خلوت ہی سہی

ہم بھی دشمن تو نہیں ہیں اپنے
غیر کو تجھ سے محبت ہی سہی

اپنی ہستی ہی سے ہو جو کچھ ہو
آگہی گر نہیں غفلت ہی سہی

عمر ہرچند کہ ہے برق خرام
دل کے خوں کرنے کی فرصت ہی سہی

ہم کوئی ترک وفا کرتے ہیں
نہ سہی عشق مصیبت ہی سہی

کچھ تو دے اے فلک ناانصاف
آہ و فریاد کی رخصت ہی سہی

ہم بھی تسلیم کی خو ڈالیں گے
بے نیازی تری عادت ہی سہی

یار سے چھیڑ چلی جائے اسدؔ
گر نہیں وصل تو حسرت ہی سہی

مرزا غالب

ishhq mujh ko nahi wehshat hi sahi
meri wehshat tri shohrat hi sahi
qata kije nah talluq hum se
kuch nahi hai to adawat hi sahi
mere honay mein hai kya ruswai
ae woh majlis nahi khalwat hi sahi
hum bhi dushman to nahi hain –apne
ghair ko tujh se mohabbat hi sahi
apni hasti hi se ho jo kuch ho
aagahi gir nahi ghaflat hi sahi
Umar harchand ke hai barq-e Khiraam
dil ke khoo karne ki fursat hi sahi
hum koi tark wafa karte hain
nah sahi ishhq museebat hi sahi
kuch to day ae fallak nainsaf
aah o faryaad ki rukhsat hi sahi
hum bhi tasleem ki khoo dalain ge
be nayazi tri aadat hi sahi
yaar se chairr chali jaye اسدؔ
gir nahi wasal to hasrat hi sahi
Mirza ghalib