Tumhen nikal kar dekha to sab khasara hai

سابِ عمر کا اتنا سا گوشوارہ ہے

تمہیں نکال کے دیکھا تو سب خسارہ ہے

کسی چراغ میں ہم ہیں ،کسی کنول میں تم

کہیں جمال ہمارا ، کہیں تمہارا ہے

ہر اک صدا جو ہمیں باز گشت لگتی ہے

نجانے ہم ہیں دو بارا کہ یہ دوبارا ہے

وہ منکشف مِری آنکھوں میں ہو کہ جلوے میں

ہر ایک حُسن کسی حُسن کا اشارا ہے

کہیں پہ ہے کوئی خوشبو کہ جِس کے ہونے کا

تمام عالمِ موجود ، استعارا ہے

وہ کیا وصال کا لمحہ تھا، جس کے نشے میں

تمام عمر کی فرقت ہمیں گوارا ہے

نجانے کب تھا! کہاں تھا ! مگر یہ لگتا ہے

یہ وقت پہلے بھی ہم نے کبھی گذارا ہے

عجب اصول ہیں اس کارو بار دنیا کے

کسی کا قرض ، کسی اور نے اتارا ہے

یہ دو کنارے تو دریا کے ہوگئے ، ہم تم

مگر وہ کون ہے جو تیسرا کنارہ ہے

امجد اسلام امجد

https://t.co/qoCxkLVF1P